前排介紹過居屋同《郊野公園條例》都係响港督麥理浩任內推行，今日就講講麥理浩嘅蝦碌事跡。原來佢60年代响英國外交部做嘢嗰陣，曾經因為遺失機密文件，陷入炒魷魚危機。如果佢當時被「豉椒炒魷」，睇怕都嚟唔到香港做港督，香港亦都無發展得咁快。

根據解密文件披露，麥理浩1967年係英國外交大臣布朗嘅私人秘書，當時麥理浩喺銀行跌咗份英國首相威爾遜send俾美國總統約翰遜嘅電報，裡面係兩國首腦商討越戰嘅嘢，仲提到威爾遜擔心英國會被視為美國傀儡，內容敏感。好彩份電報被另一個外交官執到，最後送返去外交部。

當時英國就有人要求嚴懲麥理浩，不過麥理浩得到老細布朗幫口，喺威爾遜面前讚麥理浩係個好人，又話麥理浩係因為工作太多、休息唔夠先至犯錯，最終當局對麥理浩網開一面。麥理浩之後做過駐越南同丹麥大使，經歷「密件風雲」四年之後，於1971年成為香港總督。

原圖取自網絡。